اهلا- بتِعِرفوا يا جماعة الخير ليش في عنّا عُنف ؟
صِحْ قعِدتَكْ وتَبِّعْ
ونستهلها( بإلّا من رحمَ ربي):
في عنّا عنف لأنه بَسْ بنعرف نخَلِّفْ وانزِتْ اولادنا على الشارع عشان يتربوا بالشارعْ.
ويركب (אופנוע أفنوّع) ويخزق راس اهل البلد من بعد ما يروحِنْ بنات المدارس لبعد آذان العصر !
وكل واحد منا يفحص محيطُه القريب ويشوف أكم أخو مْحورِبْ وأكم أُخِتْ لاهِط حَقّها…وقديش في بينا ناس مقاطعين اهلهُم سنينْ وما برّوهم تشفاية.
وقديش في بينا ناس إتْبَرّوا من أهلهُم بدون حَقْ وما طالهُم الا الفظيحَة وقلّة القيمِه وكل واحد عامل فيها فهمان وشيخ عَرَب!
ليشْ في عِنّا عُنف لأنُه الشيطان الرَّجيم معشِّشْ بينا وصار واحد من أهل الدّار ومسجَّل بدفتر العيله وبجوز بصوّت للكنيست.
في عِنّا عُنف لأنُه في كثير بينا إلتَهوا بعَدِّ اللّيرات ونِسيوا يأدبوا اولادهم ويربوهم وكُلْ همّهُم تيشف يحوشوا ويِبنوا ويركبوا جيب X6 وبجوز بالحَرام.
في عِنّا عُنف لانه دور الأبو مغيّبْ وما الُه قيمه بدارُه وبطل يصير أبو… وصار شرشوحَه.
ليش في عِنّا عُنف لانك بتناصِرْ ابنك على الغلط وبتسمحلوا يطاول على معلمُه ومعلمتُه. والكُلْ عاملْ فيها قبضايْ بسلَخ وبِجلِدْ !
في عنا عُنف لما بنطاوَل على بعظ بالجامع والنميمة والفساد بالجوامع رايِجْ ( الا من رحمَ ربي).
ليش في عنا عُنف شوف الصغير ما بوجّب لِكبيرْ ولا بحترمُه.
في عنا عُنف لانه ملان سَحيجّه بِتهَروَلوا على الخماخِمْ وعاملينهُم قيمه !
في عنا عنف لانه الحَدّايِه بالعرس بلزقولهم
100 ₪ على صباحُهم وببيت عتابا بيِعمَلوا من السَرسري زلمه وبصير ابو فلان (الا من رحمَ ربي) !
بتعرفوا ليش في عُنف لانك بتحاسب 8000 ₪ وبدّك تعيش بِ 80000 ₪ .
وبِتقولوا ليش عنا عُنف ؟!
عيدوا حسباتكم من جديد
نهاركم من دون عُنف
🌷هشام الزّعيم 2026
