اهلا - منقول
طب بالذمة كدا الراجل دا يتقال عنه إيه؟؟!!!
هو إنت ليه بتعمل كدا؟!
هو إنت قاصد تحرج كتير من الأساقفة والكهنة؟؟
يا قداسة البابا تصرفاتك الغير مسئولة دي
بتخلي شكل كتير من الأساقفة والكهنة وحش جدا!!
يعني وانت "كاردينال" - كبير أساقفة الأرجنتين
تبيع عربيتك الفولكس فاجن وتتبرع بتمنها للفقراء
وتقضي مشاويرك بالمترو والمواصلات العامة!!
يختاروك بابا .. تطلب من شعب الأرجنتين الفقير
إنه بدل ما يسافروا وييجوا الفاتيكان لحضور تنصيبك بابا
يجمعوا تكاليف السفر ويتبرعوا بيها للفقراء
ويتفرجوا ع الإحتفال في التليفزيون ..
حتى أختك الوحيدة سمعت كلامك وعملت كدا!!
ترفض إن خاتم البابوية بتاعك يبقى دهب أو حتى فضة
وتطلب إنه يتعمل من معدن رخيص ..
وترفض الحذاء الباباوي الأحمر ..
وترفض الإقامة في المقر الباباوي وتاخد أوضة صغيرة في أحد الأديرة!!
ترفض إن حرسك السويسري يفضل واقف على رجليه في الحراسة
وتقوم بالليل تعمل لهم سندويتشات عشان ياكلوها أثناء نوبة الحراسة!!
تنزل محل نضارات بنفسك وتطلب عدسات جديدة للنضارة بالكشف الجديد
لكن تطلب إنها تتركب على الشنبر القديم علشان
ماتصرفش من فلوس الكنيسة على نفسك!!
يصوروك في زيارتك لمصر ويكبروا الصور ..
يلاقوا إن كمك في هدومك منحول علشان
يمكن عندك طقم واحد أو طقمين بتغير فيهم
ونعل جزمتك متآكل من الإستعمال لجوز جزمة وحيد!!
طب شركة لبمورجيني تهديك عربية من إنتاجها قيمتها شئ وشويات
تقوم تعلن تمسكك بالعربية الفيات القديمة
وتعمل مزاد على العربية اللمبورجيني المصنوعة خصيصا ليك
بتجهيزات خاصة وتبيعها وتتبرع بتمنها للفقراء!!
حرام عليك .. حراام عليك .. حرااام عليك
خليت شكل كتير من الأساقفة والكهنة وحش جدا!
هو إنت ليه عامل كدا زي المسيح ...
مزعج .. مقلق .. مش مريح .. مصدر للعكننة على الأشرار؟!
ما تمشي حالك زي غيرك .. ما تعمل زي ما بيعملوا يا أخي!
هو إيه الفرق بينك وبين التانيين؟!!
الفرق إنك باصص على راعي الخراف الحقيقي يسوع المسيح
هما بقى باصين على الخراف نفسها ..
عايزين يبيعوا صوفها .. ويشربوا لبنها .. وياكلوا لحومها
هو دا الفرق ..
إنت مثال حقيقي للإنجيل المعاش عشان كدا عمرهم ما هيبقوا زيك ولا إنت تقدر تبقى زيهم ..
يا بخت كنيستنا بيك
