اهلا-بقلم محمد صالح- اخصائي سياسات عالمية

رحيل خامنئي وحلاوة البدايات
مقتل المرشد الأعلى للثورة الإيرانية علي خامنئي بداية طريق وليس نهاية نظام.. زي ما كان رحيل مبارك في 2011 بداية طريق، وتنصيب الشرع في سوريا 2025 بداية طريق، وخطف مادورو من عدة شهر بداية طريق. وبصرف النظر عن أي خيانة، أو اختراق، أو أي تكنولوجيا فظيعة مريعة عظيمة ما لم تحصل، وأي قوة غاشمة معربدة ما لها مثيل في التاريخ، الجتة مش خلصانة.
فيه ناس نزلت التحرير يوم 11 فبراير 2011 علشان "تقطف ثمار الثورة"، زي ما أكيد فيه ناس ف إيران هتنزل النهارده وبكره الصبح وخلال الأيام الجاية يمكن "تقطف ثمار الدعم الأمريكي الإسرائيلي" اللي قدمه نتنياهو وترامب. ما فيش كلام، وممكن حتى ينصبوا أفراح يومين تلاتة.
ومش هاقول لك إن اللي بيحدد معالم الطريق هو الشعب، الشعب غلبان زي حالاتي وحالاتك كده.. قل لي بالله عليك ننزل نجيب إيه من السوبرماركت علشان القتل والعنف والقمع والحروب والصراعات تسكت وتبطل ف منطقتنا؟ يعني نصحى الصبح بكره نعمل إيه علشان المنطقة تبقى أحسن، أو علشان الأنظمة تبطل أي حاجة فضلت ولا تزال بتعملها خلال الخمس ست عقود اللي فاتوا؟
ولا حاجة..
احنا مفعول به، والشعب مش هو اللي بيعمل، اللي بيعمل نخب بتتصارع فوق، شوية بيوزنوا الأمور ويقول لك نروح يمين، وشوية تانيين يقول لك لأ نروح شمال أحسن. اللي بيعمل وهيعمل اللي واقف على الخزنة، واللي ف إيده السلاح، واللي بيشغلهم همه الاتنين. احنا رهائن مش أكتر. كلنا بلا استثناء على فكرة..
ذات نفسه ترامب والمجتمع الأمريكي والمكنة العسكرية المهولة والمرعبة دي رهينة للوبي بينفذ مخططات رئيس وزراء يميني في أكتر حكومة يمينية متطرفة ف تاريخ إسرائيل. "إنه الاقتصاد يا غبي".
هل إيران وثروات إيران خلصت لحظة مقتل المرشد؟ هل إيران واقتصادها ف لحظة بقى ف إيد "المعارضة" مثلاً؟ هل ابن الشاه ده حد يعرفه ولا هيصدقه ولا هيمشي وراه ف إيران؟ هل المعارضة في المنفى ف أوروبا ومع كل تأثيرها وشغلها على الأرض داخل إيران حتى، هل هتقدر إنها تتصدر أو تأثر على المشهد داخل إيران عقب رحيل المرشد؟
هل الناس/الإيرانيين/ المتشددين دينيا (زيهم زي اليمينيين الإسرائيليين بالضبط) ف لحظة كده هيفهموا إن المرشد راح، يبقى الإيمان راح، يبقى العقيدة راحت، الأيديولوجية اختفت؟
وهل هيتعاملوا مع المعارضين، اللي المفروض هييجوا على صهوة جواد الأمريكان والإسرائيليين بأريحية ويحضنوا بعض و"كلنا إيرانيين يا شباب واللي فات مات!"، ويلا بينا نعمر إيران؟
هو سوريا تمام؟ والأكراد تمام؟ والدروز تمام؟ والعلويين تمام؟
هو الإخوان رجعوا مصر مثلاً يشاركوا في "حكومة وحدة وطنية"؟
هو الحرب في السودان، أو في جنوب السودان خلصت؟
هو حرب اليمن خلصت؟
ليبيا؟
الأمريكان عاموا على عوم إسرائيل وشايفين إن رحيل خامنئي يساوي سقوط النظام. قد يكون الكلام دقيق.. بس حتى سقوط النظام، وإن كان الأمريكان ممكن يبيعوه للداخل الأمريكي بوصفه "نصر مبين"، مش نتيجة ولا نصر حقيقي ولا نهاية، إنما بداية طريق. زي ما تقول كده "حلاوة البدايات" على رأي الإعلان إياه.